Leathnú Breise ar Bhonneagar feithiclí leictreacha chomh maith le Tacaíochtaí Gnó ar mhaithe le Todhchaí Astaíochtaí Nialasacha fógartha ag an Aire O’Brien
Nocht an tAire Iompair Darragh O’Brien dhá thionscnamh nua atá dírithe ar dhlús a chur le haistriú na hÉireann chuig todhchaí atá saor ó astaíochtaí. Leis na tionscnaimh sin, leathnófar an líonra athluchtaithe náisiúnta d’fheithiclí leictreacha agus cuirfear feabhas ar an dtacaíocht do ghnólachtaí a ghlacann le feithiclí tromshaothair leictreacha.
Is féidir iarratas a dhéanamh anois ar Chéim 3 den Scéim Deontais um Bonneagar Athluchtaithe d’Fheithiclí Saothair Éadroim (LDV) ar Bhóithre Náisiúnta
Díreoidh an chéim is déanaí ar stáisiúin athluchtaithe ardchumhachta a shuiteáil feadh 3,000km de phríomhbhóithre agus de bhóithre tánaisteacha náisiúnta, ag cinntiú go mbeidh tiománaithe fheithiclí leictreacha in ann rochtain go hiontaofa ar phointí luchtaithe fud faid na tíre.
Is é is aidhm don scéim seo ná borradh suntasach a chur faoi acmhainneacht athluchtaithe feithiclí leictreacha na hÉireann trí dhíriú ar na nithe seo a leanas:
- Suíomhanna spriocdhírithe: Saoráidí athluchtaithe poiblí ar fáil laistigh de 3 km de bhóithre náisiúnta, stáisiúin pheitril, carrchlóis agus ollmhargaí ina measc.
- Maoiniú: Infheistíocht i gcnuasacha athluchtaithe ardchumhachta le haghaidh feithiclí leictreacha
- Cur i bhfeidhm go gasta: ag cumasú seachadadh brostaithe ar an mbonneagar athluchtaithe go forleathan.
Dúirt an tAire O’Brien: “Leis an leathnú seo, treisítear ár dtiomantas chun feabhas a chur ar an acmhainneacht luchtaithe ar fud líonra EV (feithiclí leictreacha) na hÉireann. Cinnteoidh sé go mbeidh muinín ag tiománaithe an casadh leictreach a dhéanamh, agus fios acu go mbeidh rochtain iontaofa acu ar mearluchtú, cibé áit a mbíonn siad ag taisteal.”
Chun sonraí iarratais a fháil, tabhair cuairt ar www.tii.ie
Ina theannta sin, d’fhógair an tAire O’Brien leathnú ar an Scéim Deontais Ceannaigh ZEHDV freisin chun tacú le dícharbónú earnáil lasta agus lóistíochta na hÉireann.
I measc na sonraí breise sa Scéim ZEHDV-I leathnaithe cuirfear deontais bonneagair athluchtaithe iosta agus lóistíochta ar fáil. Beidh gnólachtaí in ann maoiniú a fháil anois le haghaidh stáisiúin athluchtaithe ag iostaí, moil lóistíochta agus áitribh tráchtála. Beidh an scéim ar oscailt do gach gnólacht, lena n-áirítear iad siúd nach bhfuil ZEHDVanna acu faoi láthair.
Dúirt an tAire O’Brien: “Trí thacú le ceannach feithiclí agus leis an mbonneagar luchtaithe a theastaíonn, táimid ag cur ar chumas gnólachtaí dícharbónú éifeachtúil a dhéanamh. “Is céim shuntasach chun cinn iad na tionscnaimh seo i dtiomantas na hÉireann do ghréasán iompair inbhuanaithe atá saor ó astaíochtaí - ag soláthar an tacaíocht a theastaíonn ó thiománaithe agus gnólachtaí chun glacadh le todhchaí níos glaine.”
Dúirt Príomhfheidhmeannach Bhonneagar Iompair Éireann (TII), a chomhoibríonn le ZEVI Ireland chun an scéim a riar: “Leanfaidh TII orthu ag tacú leis an dtionscnamh tábhachtach seo faoi stiúir an Aire O’Brien agus na Roinne Iompair. Trí bhonneagar feithiclí leictreacha na hÉireann a leathnú, cuideofar le gréasán iompair inbhuanaithe a chruthú do ghach duine ar an mbóthar.”
Chun sonraí a fháil faoin scéim, tabhair cuairt ar www.tii.ie
